Eer aan uitnemende Afrikaanse skrywer op 80
20 November 2023
Helene de Kock, een van Suid-Afrika se mees bedrewe Afrikaanse skrywers, vier vandag haar tagtigste verjaarsdag. Human & Rousseau, ’n druknaam van NB-Uitgewers, wens haar graag geluk met hierdie wonderlike mylpaal. Met 43 romans en ’n groot verskeidenheid ander letterkundige prestasies en bydraes op haar kerfstok kan ’n mens haar met gemak as ’n doyenne in die Afrikaanse boekebedryf beskryf.
Deur die jare heen het De Kock met vernuf ’n indrukwekkende oeuvre opgebou, insluitend romans in verskeie genres, sewe Christelike publikasies, vyf novelles en ’n magdom kortverhale wat in prominente Afrikaanse tydskrifte gepubliseer is. Haar bydrae tot die wêreld van Afrikaanse letterkunde kan eenvoudig nie onderskat word nie: De Kock het haarself deurlopend bewys as ’n uitsonderlike woordkunstenaar wie se gewildheid onder lesers nooit taan nie.
Helene de Kock se skrywersreis het dekades gelede begin en ná jare in die onderwys het skryf haar voltydse beroep geword. Haar romans, wat wissel van historiese fiksie tot kontemporêre liefdsverhale, het deur die jare ’n wye verskeidenheid lesers aangegryp. Sy besit die seldsame gawe om haar gehoor weg te voer na ander wêrelde en hulle te laat lag, huil en nadink oor die menslike toestand deur haar lewendige karakters en meesleurende storielyne.
Helene de Kock se 80ste verjaardag is om dié rede die ideale geleentheid om hierdie talentvolle, kosbare skrywer se lewenslange bydrae te vier. Haar werk het oor die jare vreugde, inspirasie en besinning aan menigte lesers gebring, en haar erfenis sal ongetwyfeld jare van nou af steeds nuwe generasies se wêrelde verryk.
Jeanette Ferreira, voormalige uitgewer en medewerker aan verskeie van De Kock se publikasies, waardeer die standvastigheid waarmee sy in haar geliefkoosde genre, nl. verhoudingsromans, skryf. “De Kock het ’n meestersgraad sowel as ’n doktorsgraad in Afrikaanse letterkunde behaal. Die meerderheid van haar verhale sentreer egter om liefde en, belangriker, die kompleksiteit van verhoudings, waarvan romantiese liefde maar een is. Dit is wat sy gekies het en sy maak nie verskoning daarvoor nie. Waarom sou sy? Al haar karakters is mense wat geglo kan word in hulle oorkoming van grense, in hulle poging om sin te maak van ’n lewe en daaraan sin te gee, iets wat veel moeiliker is as man ontmoet meisie.”
Helene is nie net gewild en geliefd onder haar lesers nie, maar ook by mense binne die boekebedryf. “Ek het ’n paar jaar gelede die voorreg gehad om Helene de Kock in lewende lywe te ontmoet,” skryf Elsa Winckler, self ’n topverkoperskrywer. “Vriendelik, statig met ’n ouwêreldse sjarme, wat my en my man albei bekoor het. Ek sou haar skryfwerk as verhoudingsverhale beskryf – sy skryf oor die liefde, ja, maar die manier waarop sy diep in die karakters delf, verleen ’n ekstra dimensie aan al haar verhale. Helene is onbeskaamd ’n Christen en ek soek gereeld op ’n Maandag na haar kort en inspirerende boodskap vir die week wat sy op sosiale media deel. Sy is en bly vir my so ’n inspirasie.”
SARIE se boekeredakteur, Phyllis Green, som haar werk só op: “Helene de Kock is ’n fyn waarnemer van mense en van die kwessies wat in verhoudings saak maak. Verhoudings tussen karakters dryf die verhale en vertel van gebeure waarmee lesers hulself kan vereenselwig. Helene se puik navorsing verskaf ’n stewige fondament vir haar geskiedkundige verhale, sonder dat die feite ooglopend aangewend word. Maar dis die menslikheid, empatie en deernis wat sy met haar karakters se dilemmas weergee wat lesers bybly.”
Truïse Prinsloo, uitgewer by Human & Rousseau, beaam wat andere oor De Kock se oeuvre te sê het, en sonder veral haar sjarme en skryfvernuf uit. “De Kock se karakters spreek van egtheid en elke storie word vertel met ’n ouwêreldse sjarme eie aan haar persoonlike menswees. Sy is veral ’n meester met die skep van ruimte, en span dikwels die natuur en seisoene in om karakters se binnewêreld en groei ten toon te stel. Enige liefdesverhouding kring wyer uit as net twee mense. De Kock se verhale ondersoek telkens ook die verhouding tussen ouer en kind, en ook dié tussen sibbe, en dikwels ook grootouers. En vir haar as skrywer staan haar eie verhouding met die Skepper as gewer van onvoorwaardelike liefde altyd sentraal tot haar oeuvre.”
Truïse vertel verder dat dit vir haar ’n absolute voorreg is om sedert 2019 Helene de Kock se boeke te kan uitgee. “Human & Rousseau wens haar vreugde en seën toe met hierdie groot mylpaal in haar lewe. Mag daar nog vele verhale uit haar pen verskyn. Namens al haar lojale lesers bedank ons haar vir al die wyse woorde, stylvolle karakters en meesleurende intriges waarmee sy ons die afgelope jare mee vermaak.”
Helene de Kock se boeke is by alle goeie boekwinkels en aanlyn beskikbaar.
Vir meer inligting kontak:
Helené Coetzee Reklamekoördineerder: Fiksie [email protected]