Dia Malan besef gou dat die plaas Droomkrans waarskynlik nie die oase gaan wees waarop sy gehoop het nie. Sy het immers nie nét ’n plaas geërf nie: Daar is ook twee koddige huismaats én die geheimsinnige Han Gericke in die kothuis.
Boonop is Han ’n soort befoeterd wat mens nou nie aldag agter élke bos uitskop nie. ’n Verbode ondersoek by dié aantreklike man se woning lewer ook meer vrae as antwoorde op. 
Dia en Han sukkel aanvanklik om mekaar se geite en giere te verstaan en albei se hardkoppigheid vergemaklik nie juis die situasie nie. Net toe dinge mooi inmekaar begin pas, arriveer twee stadsjapies. Nou moet Dia besluit: Gaan sy haar geheime onthul of moet sy wéér elders oorbegin?