KORTLYS VIR NB SE GROOT AFRIKAANSE ROMANWEDSTRYD 2021
NB-Uitgewers kondig met trots aan dat ’n rekord aantal inskrywings ontvang is. Altesaam 95 inskrywings is ontvang, teenoor die 90 inskrywings van 2018.

Die kortlys van vyf, in geen spesifieke volgorde:

• Eugene X  deur Kirby van der Merwe
• Die getuienis deur Francois Smith
• Die verleiding van Eva de Winter deur Louis Krüger
• Voorouer. Pelgrim. Berg. deur Ingrid Winterbach
• Simoelégri deur Jaco Fouché

Kirby van der Merwe se roman: Eugene X

Eugene X sit in ’n restaurant in Linden, Johannesburg en wag op Allan, ’n ou vriend van hom uit sy kinderjare. Terwyl hy wag, flits die verlede in grepe voor hom verby. Sy grootwordjare in die Boland, die dag toe hy Allan, met net die klere aan sy lyf, die eerste keer ontmoet het. Hy onthou hul onhebbelikhede deur die jare: Athlone, die Weskus en later jare Hillbrow. Maar uiteindelik was daar verraad tussen die twee boesemvriende, en word die bordjies gruwelik verhang.

Francois Smith se roman: Die getuienis

In Die getuienis doen ’n egpaar verslag oor ‘n geloofsreis wat hulle van Naboomspruit na Ventershoop en terug onderneem, een waarop hulle heeltemal op Die Voorsienigheid moet staatmaak, selfs vir petrol om in die geleende Fort Figo te gooi. 

Louis Krüger se roman: Die verleiding van Eva de Winter

Josua, ’n rekenaardeskundige, probeer vasstel wie en wat skuil regtig agter die skatryk sakeman Peter Laksman met wie sy vrou, Eva, ’n buite-egtelike verhouding aanknoop. Die roman speel af in Rotterdam en fokus op twee soorte eietydse misdaad waardeur Jan Alleman uitgebuit word. Aan die een kant konkel reuse- internationale farmaseutiese maatskappye agteraf en aan die ander kant word kapitalisme toenemend gedryf deur dotcom-firmas wat stilletjies persoonlike data oes en aan adverteerders verkoop.

Ingrid Winterbach se roman: Voorouer. Pelgrim. Berg.

Katerina Steenkamp, haar oog ferm op die berg, gaan op ’n aanlyn dating site en ontmoet mense met onverwagse gevolge. Daar is ’n man, sy kop vol apokaliptiese frases, wat van vroeg soggens die strate patrolleer sonder enige sigbare voorneme of doel. ’n Ander man hou die naghemel dop en wag op die koms van ’n elliptiese tuig. ’n Tweede vrou, aan die einde van haar lewe, besin oor haar huwelik, en die lewens van haar drie susters.

Hierdie uiteenlopende verhaallyne word op ongewone wyse saamgevleg om ’n komplekse beeld te vorm van die leefwêreld van Katerina Steenkamp. Voorouer. Pelgrim. Berg. is ’n uitdagende, dikwels konfronterende, roman, en dui bowenal op vernuwing in Winterbach se werk.    

Jaco Fouché se roman: Simoelégri

Lady Die het huisvesting gevind in die ruïne van ’n kerk, in ‘n stadsbuurt genaamd Simoelégri. Sy het tesame met baie ander vlugtelinge hier opgeëindig, ná die virus en toe nog rampe tot sosiale onrus gelei het. In ander dele van die land is daar nog sprake van orde, maar nie in Simoelégri nie. In Simoelégri is jou beste vriend die straat se dwelmhandelaar, en jou hitte kom uit 'n konkavuur. In Simoelégri loop die gerugte van groter onrus en geweld. Dit is nie meer nuus dat die Voorsienigheid dalk gekom en toe gegaan het nie. In Simoelégri sak die strukture stadig inmekaar.

Wenners sal op 21 Maart 2021 aangekondig word.

Prysgeld van altesaam R350 000 is op die spel. Die wenner ontvang R200 000, terwyl die tweede en derde prys onderskeidelik R70 000 en R40 000 beloop.

Die Groot Afrikaanse Romanwedstryd word volledig deur NB-Uitgewers geborg en vind elke drie jaar plaas. In 2012 was die wenner Die aanspraak van lewende wesens deur Ingrid Winterbach, in 2015 is die kompetisie gewen deur Dan Sleigh, met sy roman 1795, en in 2018 was die wenner Die troebel tyd deur Ingrid Winterbach.