Kortlyste vir kykNET-Rapport-boekpryse vir 2024 bekend

Twee vorige wenners van die kykNET-Rapportprys vir fiksie, Eben Venter en SJ Naudé, bevind hulle vanjaar weer op die kortlys vir dié gesogte prys. Venter is in 2014 vir Wolf, wolf bekroon, terwyl SJ Naudé in 2018 met Die derde spoel gewen het.

Daar is vanjaar een dubbelbenoeming: P.P. Fourie is vir sy tweede roman, Ons skulde, op die kortlys vir sowel die filmprys as die Jan Rabie-Rapportprys vir debuut- en tweede werke.

Die kykNET-Rapportpryse, wat saam R1 miljoen beloop, bestaan uit vier boekpryse en twee resensiepryse, en word jaarliks toegeken vir Afrikaanse werk wat in die vorige kalenderjaar verskyn het. Die vier boekpryse is die kykNET-Rapportprys vir fiksie (romans), niefiksie en film onderskeidelik, en die Jan Rabie-Rapportprys vir debuut- of tweede prosawerke.

Vanjaar se kortlyste is, in alfabetiese orde volgens skrywer:

KYKNET-RAPPORTPRYS: FIKSIE (ROMANS)

• Van vaders en vlugtelinge, SJ Naudé (Human & Rousseau)
• Gebeente, Etienne van Heerden (Tafelberg)
• Decima, Eben Venter (Penguin Random House)

KYKNET-RAPPORTPRYS: NIEFIKSIE

• Diensplig, Anelia Heese (Tafelberg)
• Dan sien ons mekaar, James Scott (Protea Boekhuis)
• Die binneland in, Dana Snyman (Tafelberg)

KYKNET-RAPPORT HERMAN BINGE-PRYS: FILM

• Ons skulde, P.P. Fourie (Queillerie)
• Maalkolk, Marie Lotz (Human & Rousseau)
• Vuurvoël, Elmarie Viljoen-Massyn (Human & Rousseau)

JAN RABIE-RAPPORTPRYS: DEBUUT- OF TWEEDE PROSAWERKE

• Die gawe van groen, Elmarie Dercksen (LAPA Uitgewers)
• Ons skulde, P.P. Fourie (Queillerie)
• Konkel, Pieter Marais (Protea Boekhuis)

Altesaam 91 inskrywings is ontvang vir die vier boekpryse wat ten doel het om erkenning te gee aan Afrikaanse skrywers en hulle aan te spoor om steeds gehalteskryfwerk in hul moedertaal te lewer.

In ’n teken van die tye woon en werk drie skrywers met titels op vanjaar se kortlyste in die buiteland: Eben Venter, Anelia Heese en James Scott.

“Dit is besielend om deurwinterde romanskrywers aan die toppunt van hul vaardigheid te sien in vanjaar se diep menslike, innoverende inskrywings,”sê die sameroeper van die pryse, Hettie Scholtz. “Dit is boeke wat die toets van die tyd sal deurstaan.”

Die beoordelaars van die kykNET-Rapportprys vir fiksie is dit eens dat die diepte van die veld van hoog aangeskrewe romans in vanjaar se inskrywings boekdele spreek oor die diepgang en lewenskrag van die Afrikaanse letterkunde, wat skynbaar gedy onder elke vorm van druk waaronder die samelewing in die algemeen en die boekbedryf in die besonder gebuk gaan. Die ryke uiteenlopendheid van tema en genre spreek verder van ’n verbeeldingskrag wat punt vir punt die uitdagings van ons tyd met kuns as antwoord tegemoet loop.

Boeke wat naas die kortlys spesiale vermelding verdien is Sluitstuk deur Johan Rossouw (Penguin Random House) en Jeanette Ferreira se roman Die melkweg en die miskruier (Tafelberg).

Vanjaar se inskrywings vir niefiksie hou vir ons ’n spieël op na ons samelewing. Daarin word ons teenstrydighede, ons ongemak, ons mites, ons wonde en ons rowe teruggekaats. Die werke getuig van fyn waarneming. Klein, skynbaar nietige besonderhede vertel groter verhale; priemende kommentaar lê in die alledaagse opgesluit. Daar word nie teruggedeins vir groot idees nie, daar word geredeneer, daar word gelag en daar word gehuil. Dit alles word in helder Afrikaans gedoen, wat ons woordeskat, ons verbeeldingswêreld en ons denkwêreld verbreed en verryk.

Die individuele prysgeld beloop R300 000 elk vir die kykNET-Rapportprys vir romans en niefiksie, R155 000 elk vir die kykNET-Rapport Herman Binge-filmprys en Jan Rabie-Rapportprys, en R45 000 elk vir die kykNET-Rapport-resensiepryse vir fiksie en niefiksie onderskeidelik. Die kortlyste vir die resensiepryse word later aangekondig.

Die wenners word op 21 September 2024 bekend gemaak tydens ’n funksie by die Mount Nelson Hotel in Kaapstad.

Die keurpanele vir die onderskeie boekpryse was: kykNET-Rapport-fiksieprys: Frederik de Jager, Bibi Slippers, Ryan Pedro en Beer Adriaanse; kykNET-Rapport-niefiksieprys: Lindie Koorts, Bill Nasson, Kerneels Breytenbach en Andries Bezuidenhout; kykNET-Rapport Herman Binge-filmprys: Beer Adriaanse, Wikus du Toit en Kerneels Breytenbach; Jan Rabie-Rapportprys: Anastasia de Vries, Willie Burger en Francois Smith.

……………………………………………………………………………………………………………………..

EINDE

Navrae oor die kykNET-Rapport Boekpryse (fiksie, niefiksie en film) kan gerig word aan Hettie Scholtz by 084 583 0272 of [email protected] .

Vir meer inligting oor die pryse vir Boekresensent van die Jaar en die Jan Rabie-Rapportprys, kontak Anita van Zyl by 083 709 6677 of [email protected].