Prysgeld verhoog tot R1 miljoen

Vroueskrywers maak skoonskip op die twee fiksiekortlyste vir vanjaar se kykNET-Rapport-boekpryse. Onder hulle is die bekroonde digter Ronelda Kamfer wie se debuutroman Kompoun vir beide die kykNET-Rapportprys vir romans en die Jan Rabie-Rapportprys vir eerste of tweede prosawerke benoem is.

Die vier kortlyste vir die boekpryse, wat toegeken word vir werk wat in 2021 verskyn het, is pas bekend gemaak.

Die prysgeld vir die kykNET-Rapportpryse is verhoog en beloop nou altesaam een miljoen rand. Pryse word soos volg toegeken: R300 000 elk vir die kykNET-Rapportprys vir fiksie (romans) en niefiksie onderskeidelik, R155 000 vir die kykNET-Rapport-filmprys, R155 000 vir die Jan Rabie-Rapportprys, en R30 000 elk vir drie resensiepryse.

Die verhoogde prysgeld  het ten doel om as erkenning, onderskraging en aansporing te dien vir Afrikaanse skrywers en resensente om steeds skryfwerk van gehalte te lewer in hul moedertaal.

Altesaam 66 inskrywings is ontvang vir die drie kykNET-Rapport-boekpryse vir romans, niefiksie en beste verfilmbare werk, en 18 vir die Jan Rabie-Rapportprys vir debuut- of tweede prosawerke.

Die inskrywings is bewys dat daar nog baie petrol in Afrikaanse skrywers se tenks is, sê die sameroeper van die pryse, Hettie Scholtz. Lien Botha, wat in 2016 die Jan Rabie-Rapportprys vir Wonderboom ontvang het, pryk vanjaar op die kortlys van die kykNET-Rapportprys vir fiksie met haar tweede roman, Vin, terwyl Gerda Taljaard, wenner van die filmprys in 2018 vir Die laksman se dogter, in die fiksiekategorie benoem is vir haar vierde roman, Vier susters.

Die bekende uitgewer Nicol Stassen bevind hom op die kortlys vir niefiksie, terwyl ’n debuutskrywer, Marco Botha, benoem is vir die beste verfilmbare werk.

“Goeie vordering met transformasie in die taal- en kulturele ruimte val op met die voorlegging van nege boeke deur bruin skrywers vir die kykNET-Rapportpryse. Dis ook verblydend dat daar elke jaar meer uitgewershuise is wat boeke voorlê,“ sê Hettie Scholtz.

Die verlede speel steeds ’n beduidende rol by heelwat kragtige narratiewe onder die inskrywings vir die fiksieprys, so ook die tapisserie van disfunksie van die hede. Naas die kortlys verdien ’n paar ander skrywers spesiale vermelding: Ingrid Winterbach vir die ryk intertekstuele spel in Voorouer. Pelgrim. Berg., Zirk van den Berg vir die haarfyn besinning van held en heldedom in Een of ander held, en Jan van Tonder vir Grootgeluk waarin hy die aard en wese van die gekerstende beskawing takseer.

By niefiksie is die aanbod grootliks ’n blik na binne, die persoonlike, of sake rakende die Afrikaner, met ’n opvallende leemte aan aktuele, besinnende boeke oor Suid-Afrikaanse en internasionale problematiek van die dag, die soort boeke wat deesdae net in Engels verskyn. Naas die boeke op die kortlys verdien ’n paar ander vermelding: die nadenkende joernaal Hier waar ek nou is deur Matty Strydom, Juliana Coetzer se besondere vertelling Die kind se naam is Anneke, ’n Baie lang brief aan my dogter deur Marita van der Vyver en Afrikaner-Sondebok? Die lewe van Hans van Rensburg, Ossewabrandwag-leier deur Albert Blake.

Die kortlyste vir vanjaar se boekpryse is, in alfabetiese volgorde volgens skrywer:

KYKNET-RAPPORTPRYS: FIKSIE (ROMANS)

• Vin deur Lien Botha (Queillerie)
• Kompoun deur Ronelda Kamfer (Kwela)
• Vier susters deur Gerda Taljaard (Penguin)

KYKNET-RAPPORTPRYS: NIEFIKSIE

• Als is nie net swart en wit nie deur Malvory Adams (Naledi)
• Fortuine deur Ebbe Dommisse (Jonathan Ball)
• Van Humpata na Upingtonia deur Nicol Stassen (Protea Boekhuis)

KYKNET-RAPPORTPRYS: FILM

• Roet deur Hannes Barnard (Lapa)
• Die storie van Gert Saggiestrap deur Marco Botha (Flyleaf)

• Die getuienis deur Francois Smith (Tafelberg)

 

JAN RABIE-RAPPORTPRYS VIR DEBUUT- OF TWEEDE PROSAWERKE (ROMANS, NOVELLES EN KORTVERHALE)

• Vel deur Emma Bekker (Protea Boekhuis)
• Die teenoorgestelde is net so waar deur Azille Coetzee (Human & Rousseau)
• Kompoun deur Ronelda Kamfer (Kwela)

KEURDERS

Die keurders vir vanjaar se kykNET-Rapportprys vir fiksie was Sonja Loots, skrywer en dosent aan die Universiteit van Kaapstad; die boekeredakteur Elna van der Merwe; die skrywer, akteur en draaiboekskrywer Beer Adriaanse; en die skrywer en vertaler Kirby van der Merwe. By niefiksie was die keurders die gesoute joernalis Annemarie Mischke; die regsgeleerde en boekjoernalis Jean Meiring; Bill Nasson (US); en die ouduitgewer en skrywer Kerneels Breytenbach. Die filmkeurders was Beer Adriaanse, Kerneels Breytenbach en Suzaan Keyter van M-Net. Die keurders vir die Jan Rabie-Rapportprys was Anastasia de Vries, oudjoernalis en dosent aan UWK; Bibi Slippers, boekjoernalis en digter; en die skrywer en joernalis Charl-Pierre Naudé.

Die wenners word op Saterdag 24 September 2022 in Kaapstad aangekondig.

Die kortlyste vir die drie kykNET-Rapport-resensiepryse word apart aangekondig.