Hierdie keur uit Johann de Lange se 8 gepubliseerde bundels is deur die digter self gedoen. Hy het 10 nuwe verse aan die einde ingesluit.

Die titels van De Lange se bundels vertel 'n eie verhaal. Van die eerste bundel Akwarelle van die dors deur die Van Wyk Louw-geïnspireerde Wordende naak tot die openbarende en uitdagende Nagsweet en tot die jongste bundel Die algebra van nood, word daar 'n kaleidoskoop geweef van verrassende en soms “skokkende” fasette van menswees en die broosheid van die menslike psige.

Meer as enige ander Afrikaanse digter of skrywer het Johann de Lange die wêreld van gay-wees in Afrikaans verken. Teen die agtergrond van die gay Amerikaanse en Europese literatuur en binne die beste tradisies daarvan, het hy sy eie stempel op die genre gedruk en vir die Afrikaanse letterkunde nuwe perspektiewe verken. Sy werk bly nie vassteek binne die gay-sensibiliteite nie, maar hy herlei dit tot die diepste wêrelde van menslike deernis en wanhoop.